तामझामसा-तामझामसा।
सांची-सांची कैवां जद लागै डाम सा
गिरतां-पड़तां-आखड़तां री
दुनियां किसी न्यारी है
धायोड़ा नै धिंगाणै ही
पुरसण री क्यूं धारी है।
ऊंची हेली रैवणियां रा ऊंचा दाम सा
तामझामसा
मिनखाचारो लीरो-लीरो
कुणसो ईं नै सीम सी
सग्गी रांडां रोती रैसी
पावणां तो जीम सी
ताळ्यां रा तमासा देखो बिना दाम सा
तामझामसा
माणसिया गटकावै
टाबर गळियां में गरळावै है
परजा तंतर आछो मंतर
लांठोड़ा झरळावै है
मिनखां नै मरावणियां में थारो नाम सा
तामझामसा
फुटपाथां रा फोड़ा देखो
गांधी जी रै देस में
सुख रा सपनां देख्यां राखो
भरोसां रै भेस में
मंगतां री कत्तारां लाधै सरै आम सा
तामझामसा।
ओसर चूक्यां गावणियाँ तो
ऊंदा-सूंदा गावैला
मोको दियां डाकीड़ां नै
डांगर ज्यूं गटकावैला
लूटो खोसो खावो किसी रोक थाम सा
तामझामसा।
सूनै-सूनै चैरां माथै
ऊना-ऊना आखर है
माटी मूंडै बोलण लागी
सामी छाती टाकर है
बत्तीसी दिखावणियां में कठ्ठै राम सा
तामझामसा।
म्हारा नेता झूठा झांसा
देणो आं रो काम है
पापी-पैणा जीवन-लेणा
लेणै में बदनाम है
लोगां नै बणाणो आं रो पैलो काम सा
तामझामसा।
आया जिक्का अम्मर कोनी
जाम्या जिक्का जावैला
आकासां में उडणियां तो
धरती माथै आवैला
आंसूड़ा ढळकावै देखो सुख्खी राम सा
तामझामसा।
घर घोस्यां रा बळसी
पण के ऊंदरिया सुख पावैला
आं लखणां रा लाडा बाबू
गट्टा गोळी खावैला
चमचा-चमची करसी आं रा चक्का जाम सा
तामझामसा।
