फूलां री निछरावळ करतो फागण आयो रे
होळी गावण दे
हा रे होळी गावण दे रे, चग बजावण दे
होळी गावण दे
वायरियो गूंगो बण पग में पायल बांध्या नाचै ओ
धरती री कूंपळ-कूंपळ में मैंदी राचै ओ
रग चढावण दे
हा रे रंग चढावण दे, रे रंग उडावण दे
होळी गावण दे
काजळ पाड़ै कोयलडी तो मैंदी मोवन धोळी ओ
पगल्या मांडै पचरगी अर नाचै टोळी ओ
घूमर घालण दे
हा रे घूमर घालण दे, रे धमचक माचण दे
होळी गावण दे
गांव गुवाडी अळियां-गळियां चंग रगीला बाजै ओ
छैला देवै ताल रसीलो जोबन लाजै ओ
रस बरसावण दे
हा रे रस बरसावण दे, रे रूप रिझावण दे
होळी गावण दे
अम्बर रै आंगणियै चांदो आवै तारा हेलै ओ
धरती पर ढोलां रै ढमकै डंडिया खैलै ओ
गै’र रचावण दे
हा रे गै’र रचावण दे, रे नेह बधावण दे
होळी गावण दे
परभातै सूरज बनड़ोजी सरवर मुखड़ो झांकै ओ
मुजरा देती जाती सांझ गुलालां नांखै ओ
रथड़ो हांकण दे
हा रे रथड़ो हांकण दे, रे हिंगळू नाखण दे
होळी गावण दे...!
