अेक छोरी काळती हमेसा जीव बाळती,
सींवां जोड़ खेत म्हारो चाव सूं रूखाळती
अेक छोरी...
ऊंचै-ऊंचै टीबड़ां में रूंखड़ा रो खेत हो,
खेत रुजगार म्हारो खेत सूं ही हेत हो।
हेत हरियाळयां नैं तावड़ां सूं टाळती।
अेक छोरी...
बेल बीं रो सीस फूल, फूल बीं री राखड़ी,
अेक बार आखड़ी तो बार-बार आखड़ी।
लाज सूं झुकी-झुकी सी चूनड़ी संभाळती
अेक छोरी...
भोत राजी रैंवती तो झूंपडी बुहारती,
रूसती तो गावड़्यां नैं बाछड़ा नैं मारती।
हेत जे जणावती तो टींडसी उछाळती।
अेक छोरी…
गांव रै गुवाड़ बीच देखती ना बोलती,
हेत सूं बुलांवता तो आंख भी ना खोलती।
खेत में ना जावता तो गाळीयां निकाळती।
अेक छोरी…।
