डर सूं डरो तो दुनियां मारै
डर सूं डरपणियो मन हारै
डरतो मिनख मिनख रै लारै
नैया कुणसो पार उतारै।
दै गोतो डर भागसी
बतळायां डर जागसी
बुचकार्यां डर लागसी
मिसरी मूंडै लाड लडायां
बिन फागण भी फागसी
खुल्ली गोळ्यां दागसी।
थारी करणी रो फळ पा रै
माथै चढ़िया किणनै धारै
रूपां रुड़ौ आंख्यां झारै
नैया कुणसो पार उतारै।
फाटी गूदड़ी सीणी है
खारा तूंबा पीणा है
है मरणो— पण जीणो है
डर डांफर बण गांव उजाड़ै
कायर जूण चबीणो है
नाव डूबसी तीणो है।
