फळसै ऊभी हूण
बचाओ म्हारा बीरा रे
दुख री लागी दूण
बचाओ म्हारा बीरा ने
सुधरै कैयां जूण
बताओ म्हारा बीरा रे॥
धरम करम री पोथ्यां बांचत
बीत गया जुग चार
मैनत नै मुळकतां देखी
इण रा रंग हजार
थे समै सारू भूण घुमाओ
म्हारा बीरा ने
सापोड़ां रा सूण मनावो
म्हारा बीरा रे॥
झूंपड़ल्यां री रात बीतसी
पूरब होसी लाल
देख पसीनो दाळद दोड़ै
आज नईं तो काल
थारै घर री बदळै रूण—कमाओ
म्हारा बोरा रे
सुधरै थांरी जूण—कमाओ
म्हारा वीरा रे॥
कुचमादी काचरियै गुण रा
गुण हीणा नर-नार
लट-कातर सी करणी हाळा
जीवैला दिन चार
औरी वेगी आवै हूण—बताओ
म्हारा वीरा रे
रोक़ै अठ्ठै कूण—बताओ
म्हारा बीरा रे
मिनख-मिनख री बातां न्यारी
एक मिनख रो मोल
प्यार प्रेम स्यूं बोलणियां नै
लेवां हीरां तोल
थारै सुख रो लागै दूण—बताओ
म्हारा बीरा रे
सुधरै थांरी जूण—कमाओ
म्हारा वीरा रे॥
