बाबल मूं पण थारी जायी।
मायड़ मूं पण थारी जायी॥
मनै मार गरभ मं कां बगदा ज्यूं खाडा में रळकायी॥
नाना-नाना पगल्या धरती छम-छम पायल बाजती।
मूं थारै आंगणियै रमती लछमी-सुरसत लाजती॥
बाबल थूं पण बैठ्यो बैरी।
मायड़ मूं थनै नीं भायी॥
मनै मार गरभ में कां बगदा ज्यूं खाडा में रळकायी॥
घोड़ी चढ़नै बींद आवतो, बजता बाजा ढोल।
चंवर्यां रचती फेरा व्हैता दादासा री पोळ॥
रैग्यो कुंवारो आंगणियो।
दिल में थारै दया न आयी॥
मनै मार गरभ मं कां बगदा ज्यूं खाडा मं रळकायी॥
कुण बीरा रो बरत करैला? कुण राखी बान्धैला।
भाया का मांडा मं झुक-झुक कुण नाचै कूदैला॥
चून्दड़ कुण ओढ़गा थारी।
मूं तो रैगी अण छायी॥
मनै मार गरभ मं कां बगदा ज्यूं खाडा मं रळकायी॥
बेटी वध रो पाप बाप थारै पाछै-पाछै फरसी।
न जी सकसी थूं थरता सूं न थरता सूं मरसी॥
जण-जण जाया न खा जावै
हपणी बणगी थूं मायी॥
मनै मार गरभ मं कां बगदा ज्यूं खाडा मं रळकायी॥
ठालाबूला अरै डाकदर थारो हियो फूट्यौ।
राम तो रूठ्यो ज्यो रूठ्यो थूं कां काढ्यौ टूंट्यौ॥
बूढापो थारो गणो बगड़सी।
चुकाणी पड़सी पाई-पाई॥
मनै मार गरभ मं कां बगदा ज्यूं खाडा मं रळकायी॥
