छिण छिण सोहै छांटड़ल्यां री छोळ
सूरज किरणां सर सर उतरै
अंग अंग सुवरण झोळ
पानां पानां पळ पळ थिरकै
कर कर खूब किलोळ—छिण॰
धर रा सूका कण कण मेळै
नैणां में रस घोळ
भूरा भूरा बादळ भूळै
टीबड़ियां सूं रोळ—छिण॰
तालरियां में तड़ तड़ नाचै
छीलरियां रमझोळ
छातां ऊपर छम छम नाचै
परनाळां सूं बोळ—छिण॰
खाळां री खळ खळ में खेलै
पोखर पोळापोळ
नाळां री कळ कळ में न्हावै
पाळां रा पग खोळ
जड़ जगती नै चेत करावै
चेतन चित्त हिलोळ—छिण॰
