म्हे आंख्यां देखी लोगां रे
आ बाड़ खेत ने खावै है
काचरियाँ कंवळा-कंवळा नै
टींडसड़ी अर फोफळियाँ नै॥
अण छोल्या ही गट कावै है।
आ/नूंत काळ नै ल्यावै है॥
तिल तार करै कोनी अठ्ठै
बेलां में ककू पड़ी बठ्ठै
काचरिया किचर-किचर मर ग्या
सिट्टाँ रो नाड़ कटे अठ्ठै
आ मोठ बाजरी फळियाँ नै
चुगयोड़ा भाँवैं अळियां नै
आ सगळां नै गटकावै है
आ नूंत काळ नै ल्यावै है॥
ए मोटै नैणां में भरयां नीर
कंवळै गातां में सूळ-सूळ
धिरकार जनम सै धूळ-धूळ
छोटै मोटै रो आण कठै
टकै घड़ी सै बिकै अठै
आ सगलां नै गट कावै है
आ नूंत काळ नै ल्यावै है॥
ए डरया बापड़ा तूंतड़िया
चींचाट करी अर आपड़िया
डोकांरो डोळ डांखळां रो
उड आय बाड़ में जा पड़िया
आ खेतां खेत डकारै है
आ जीव जलमता मारै है
आ सूतां नै झटकावै है
आ नूंत काळ नै ल्यावै है
म्है आंख्या देखो लोगां रे
आ-बाड़ खेत नै खावै है।
