बाय चाल्या छै भंवर जी पींपळी जी
हांजी ढोला हो गई घेर घुमैर
बैठण की रुत चाल्या चाकरी जी
ओजी म्हारी सास सपूती रा पूत
मत ना सिधारौ पूरब की चाकरी जी
परण चाल्या छा भंवर जी गौरड़ी जी
हांजी ढोला हो गई जोध जवान
विलसण की रुत चाल्या चाकरी जी
ओ जी म्हारी लाल नणद बाई रा बीर
मत ना सिधारो पूरब की चाकरी जी
कुण थ्हारां घुड़ला कस दिया जी
हांजी ढोला कुण थ्हानै कस दीनी जीण
कुण्यांजी रा हुकमा चाल्या चाकरी जी
ओजी म्हारै हिवड़ा रो नौसर हार
मत ना सिधारौ पूरब की चाकरी जी
रोक रुपैया भंवर जी मैं बणूं जी
हां जी ढोला बण ज्याऊं पीळी-पीळी-मोहर
भीड़ पड़ै जद सायबा बरत ल्यौजी
ओजी म्हारी सेजां रा सिणगार
पिया की पियारी नै सागै ले चालो जी
कदेई नां ल्याया भंवर जी चूनड़ी जी
हां जी ढोला कदैई ना करी मनवार
कदैई ना पूछी मनड़ै री बातां जी
हां जी म्हारी लाल नणद रा बीर
थ्हां बिन गौरी नै पलक ना आवड़ै जी
बाबोसा नै चायै भंवर जी, धन घणो जी
हां जी ढोला कपड़ै री लोभण थ्हारी मांय
सैजां री लोभण उडीकै गौरड़ी जी
हां जी थ्हारी गौरी, उड़ावै काळा काग
अब घर आवो, धाई थारी नौकरी जी
चरखौ तो लेल्यो भंवर जी रांगलो जी
हां जी ढोला पीढ़ो लाल गुलाल
मैं कातूं थे बैठा बिणजल्यो जी
ओजी म्हारी लाल नणद रा बीर
घर आओ प्यारी ने पलक ना आवड़ै जी
सावण सुरंगों लाग्यो भादवो जी
हां जी कोई रिमझिम पड़ै छै फुहार
तीज तिंवारा घर नहीं बावड़िया जी
ओजी म्हारा घणा कमाऊ उमराव
थारी पियारी नै पलक ना आवड़ै जी
फिर-घिर महिना भंवर जी आय गिया जी
हां जी ढोला हो गया बारा मास
थारी धण महला भंवर जी झुर रही जी
हां जी म्हारै चुड़लै रा सिणगार
आच्छा पधार्या पूरब की नौकरी जी
उजड़ा खेड़ा भंवर जी फिर बसै जी हां जी
ढोला निरधन रै धन होय
जोबन गयां पाछै नांही बावड़ै जी
ओजी थ्हानै लिख हारी बारम्बार
ओजी घर आवो थारी धण अेकली जी
जोबन सदा नां भंवर जी थिर रेवै जी
हां जी ढोला फिरती-घिरती छांव
पुळ का तो बाया मोती नीपजै जी
ओ जी थारी प्यारी जोवै बाट
जल्दी पधारौ गौरी रै देस में जी।
