रगड़-रगड़ पग धोवती
म्हैं ऊंचा रे रखती तोड़ा
परण्या रे थारै राज में
लूण-मिरच रा फोड़ा रे
बुगला ढाणी से उड़ जाईजे रे
म्हैं नखराळी नार बेड़लो भरवा दीजै रे
ऊंची रे मेड़ी ऊजळी
जिण में पौती रोटी
छैल भंवर री ओळ्यूं आवै
धुंअै रे बिच रोती रे
बुगला ढाणी से उड़ जाईजे रे
म्हैं पातळकी नार बेड़लो भरवा दीजै रे
काळी री हांडी जोजरी
म्हैं जिणमें रे रोंध्या होळा
अरे होळा रे होळा क्यां करो
परण्योड़ा मिळग्या मोळा/भोळा
बुगला ढाणी से उड़ जाईजे रे
म्हैं नखराळी नार बेड़लो भरवा दीजै रे
नारंगी खायी, तरबूज खाया
कदैई न खायौ केळौ रे
परण्या रे थारै राज में
मंडो रे बाळौ मेळौ रे
बुगला ढाणी से उड़ जाईजे रे
म्हैं नखराळी नार बेड़लो भरवा दीजै रे
अस्सी रे कळी रौ घाघरौ रे
कळी रे कळी में घेर
पहर बजारां रे नीसरी
रुपियां रौ ढिगलौ ढेर
बुगला ढाणी से उड़ जाईजे रे
म्हैं नखराळी नार बेड़लो भरवा दीजै रे
भंवर सा री रे पोळ माथै
ऊँचो रे लागो पोचो
ए हूं तो रे म्हारै रे पीवर चालूं रे
घणौ रे फिरैला रोतो
बुगला ढाणी से उड़ जाईजे रे
म्हैं नखराळी नार बेड़लो भरवा दीजै रे
