विनोद स्वामी
ठावा कवि। भाषा मान्यता आन्दोलन रा समर्पित सेवग।
ठावा कवि। भाषा मान्यता आन्दोलन रा समर्पित सेवग।
जन्म: 14 Jul 1977 | परलिका,भारत
जनकवि विनोद स्वामी रो जलम 14 जुलाई 1977 नै हनुमानगढ़ जिलै रै साहित्य गाम परलीका रै मांय पिता श्री रामलाल स्वामी अर माता श्रीमती चंद्रपती देवी रै आंगणै हुयो। आप भणाई एम.ए. (राजनीति विज्ञान), यूजीसी नेट राजस्थानी अर पत्रकारिता रै मांय बीजेएमसी पण करी ही, उण पछै सुतंतर लेखन कर रैया है। आपरा गीत अर कवितावां ही आपरै जनकवि हूवण री सांची पिछाण करावै आपरै गीत अर कवितावां रो सांतरो असर मजूर-किरसां री आम सभावां में देख्यो गयो है। राजस्थानी भासा री मानता सारू आप हजारूं गावां रो दौरो कर’र भासा नै जन-जन ताईं पुगावण रा जतन करिया। जन-आन्दोलणां मांय भागीदारी निभावण सारू आपनै एकर जेळ भी जावणो पड़ियो। आप किरसाण, मजूर अर दीन-दुखी रै हक-हुकूक वास्तै हमेस ऊभा निजर आवै। आपरै सिरजण री खासियत आ रही कै आप मानवीय परिस्थिति अर दर्द री अभिव्यक्ति तांई खुद नै सीमित करण री बजाय अन्याव सूं जूंझणवाळां रो हौसलो बधावण मांय आपरै सिरजण री सारथकता समझी अर आप वैग्यानिक अर तारकिक बदळाव रा असल हिमायती है।
'चालूं अे बाई छियां ढळगी' कविता संग्रै मांय स्वामी आसै-पासै रै परिवेस नै नवै सिरै सूं समझण अर कविता मांय उणरा सकारात्मक पखां रो नवो अरथ उजागर करण री पैल करी है।
छप्योड़ी पोथ्यां :- 'गीत गुलशन' अर 'वीरों को सलाम' हिंदी अर राजस्थानी मांय टाबरां सारू गीत, 'आंगन, देहरी और दीवार' हिंदी कविता संग्रै, 'प्रीत कमेरी' अर 'चालूं अे बाई छियां ढळगी' राजस्थानी कविता संग्रै अर गद्य विधा रै मांय ‘सिधसारू’ जातरा विरतांत आद लिख’र आप राजस्थानी साहित्य नै घणी ऊंचाई दीनी है। आप 'कथेसर' राजस्थानी भासा री तिमाही पत्रिका रो प्रबंध संपादन कर रैया है अर सोसल मीडिया रै मंचां सूं आप राजस्थानी मान्यता आन्दोलन रै पांख लगाई है। कथेसर पत्रिका रा संपादक रामस्वरूप किसान अर डॉ. सत्यनारायण सोनी रै साथै राजस्थानी भासा रा नवा लिखारां नै मंच देवण री चावी खेचळ आप करी है। आपरी रचनावां देस अर परदेस री नामी गिरामी पत्र-पत्रिकावां मांय लगोलग छपै अर अंग्रेजी रै अलावा केई भारतीय भाषावां मांय रचनावां रो उल्थो पण हुयो।
पुरस्कार अर सम्मान- सूरतगढ़ टाइम्स सूरतगढ़ रो भासा सम्मान, मरुधरा साहित्य परिषद हनुमानगढ़ रो कुंवर चन्द्रसिंह बिरकाळी सनमान, सुगन साहित्य संस्थान सूरतगढ़ रो सुगन साहित्य सनमान, लाफ्टर चैंपियन कॉमेडियन ख्याली सहारण 18 एसपीडी कानी सूं चौधरी दौलतराम सहारण संस्कृति अवार्ड, जन विकास पत्रिका जयपुर रो गौरव सम्मान, कथा संस्थान जोधपुर रो सत्यप्रकाश जोशी कविता सम्मान, भगतसिंह मंच सिरसा रो शहीद- ए-आजम भगतसिंह सम्मान, राना कनाडा रो पदम श्री कन्हैयालाल सेठिया अन्तर्राष्ट्रीय पुरस्कार, अखिल भारतीय राजस्थानी सम्मेलन जोधपुर रो राजस्थानी साहित्य सनमान आद इनाम इकराम आपनै मिल्या है।