सत्यदेव संवितेन्द्र
चावा कवि-गीतकार। 'समय रा साच' 'जूण जात्रा' 'सबद भरै साख' पोथी प्रकाशित।
चावा कवि-गीतकार। 'समय रा साच' 'जूण जात्रा' 'सबद भरै साख' पोथी प्रकाशित।
जन्म: 15 Jun 1957 | जोधपुर,भारत
सत्यदेव संवितेन्द्र रो जलम 15 जून 1957 नै जोधपुर रै मांय हुयो। ललित निबंधकार रै रूप मांय सत्यदेव संवितेन्द्र नै लूंठी पिछाण कायम करी है। आप राजस्थानी अर हिन्दी मांय लारलै पैंतालीस बरसां सूं लगोलग साहित्य रो सिरजण कर’र साहित्य नै घणी ऊंचाई दीनी। चावा ठावा कवि सत्यदेव संवितेन्द्र नै अजै तांई 64 पोथ्यां रो सिरजण अर 11 पोथ्यां रो संपादन करयो है। जिण सूं आप राजस्थानी साहित्य रै घणी पांख लगाई अर आपरो नांव राजस्थानी रै सिरै आगीवाण कवियां मांय गिणायो है।
राजस्थानी मांय छप्योड़ी पोथ्यां- समै रा साच, जूण जातरा, सबद भरे साख, ओळू रै आगणियै, सदी रै बाजारू कांठै, अंतस री सतरंगी सांसां, न्यू पिंच, माडधरा बतळाती बोले, धोरां तपी बेकळू बोलै, जूणां री ओळं सांसां में घोळू आद पोथ्यां है। आप हिन्दी मांय कविता, कहाणी, नाटक, उपन्यास अर विचार-सूत्र आद विधावां मांय लेखन कर’र साहित्य नै घणो सिमरध करयो है। देश अर परदेस री नामी गिरामी पत्र-पत्रिकावां रै मांय आपरी रचनावां छपती रैवै। अनेक संस्थावां कानी सूं आयोजित सिरजण कार्यशालावां मांय भागीदारी निभावतां थकां आप आकाशवाणी अर दूरदर्शन माथै काव्य पाठ अर साहित्य विषयक मंच माथै सैयोग अर संचालन पण करयो है।
सम्मान अर पुरस्कार- राजस्थान साहित्य अकादमी, उदयपुर रा शंभुदयाल सक्सैना साहित्य पुरस्कार। राजस्थानी भाषा साहित्य एवं संस्कृति अकादमी, बीकानेर रो गणेशलाल व्यास 'उस्ताद' राजस्थानी साहित्य सम्मान। सलिला संस्थान, सलूम्बर कानी सूं मानवीय मूल्यां री पुन स्थापनार्थ सृजन धरमिता रै वास्तै स्वतंत्रता सैनानी श्री औंकारलाल शास्त्री स्मृति साहित्य सम्मान। साहित्य, कला एवं संस्कृति संस्थान, हल्दीघाटी, नाथद्वारा रो साहित्य शिरोमणि सम्मान। सिटिजन्स सोसाइटी फॉर एज्यूकेशन, जोधपुर कानी सूं डॉ. नरसिंह राजपुरोहित राजस्थानी साहित्य पुरस्कार। मेहरानगढ़ म्यूजियम ट्रस्ट, जोधपुर कानी सूं मारवाड़ रतन अवार्डबैंक ऑफ बड़ौदा क्षेत्रीय कार्यालय जोधपुर कानी सूं राष्ट्र भाषा हिन्दी री सेवा रै वास्तै भाषा सम्मान। राजस्थान सरकार रै कला एवं संस्कृति विभाग जयपुर कानी सूं राजस्थानी थियेटर एवं फोक फेस्टीवल में रंग राजस्थान पुरस्कार आद इनाम इकराम आपनै मिल्या है। आप वर्तमान राज्य सरकार कानी सूं गठित पं. जवाहर लाल नेहरू बाल साहित्य अकादमी, जयपुर मांय सदस्य है। आप अकादमी री पत्रिका 'सतरंगा बचपन' रै संपादन रो लूंठो कारज पण करो।