हीरालाल सास्त्री
कवि-लेखक। राजस्थान रा पैला मुख्यमंत्री रै रूप में ख्यात।
कवि-लेखक। राजस्थान रा पैला मुख्यमंत्री रै रूप में ख्यात।
जन्म: 24 Nov 1899 | जयपुर,भारत
निधन: 28 Dec 1974 | जयपुर,भारत
राजस्थान रा आगीवांण सुतंतरता सेनानी अर मुख्यमंत्री रै ओहदै तांई पूगण वाळा हीरालाल शास्त्री रौ जन्म 24 नवम्बर, सन् 1899 में जयपुर रै नेड़ै जोबनेर कस्बै मांय हुयौ। वांरै पिता रौ नांव श्रीनारायण जोशी अर माता रौ नांव ममता जोशी हौ। बाळपणै मांय ई वां री माता रौ देहांत हुयग्यौ अर वै टाबरपणै मांय ई माता रै नेह सूं वंचित हुयग्या। शास्त्री भणाई में घणा हुंस्यार हा अर वां सोळह बरसां री उमर में जोबनेर हाई इस्कूल सूं मैट्रिक री परीक्षा पास करी। इण रै पछै वां जयपुर सूं साहित्य शास्त्री अर बी. अे. री उपाधियां हासल करी। इणी बगत वां रौ झुकाव आजादी सारू चालण वाळी मुहिम कानीं हुयौ अर वै असहयोग आंदोलन में भाग लेयनै आजादी रै संघ्रस में सामल हुयग्या। पछै छः बरसां रै लगैटगै वां आपरै पिता री मनसा मुजब सरकारी नौकरी ई करी। उण बगत रा आगीवांण सुतंतरता सेनानी अर्जुनलाल सेठी रै सम्पर्क में आय नै शास्त्री आपरी राज री नौकरी छोड़ दी अर समाज-सेवा में लागग्या। 12 मई, 1929 ई. मांय वां जयपुर रियासत रै निवाई कस्बै रै नेड़ै वनस्थली गांव मांय जीवन-कुटीर नांव री संस्था री सरूआत करी जिणमें भणाई करावण रै साथै वां गांधीजी रै दरसण अर सिद्धांतां रौ प्रचार-प्रसार ई सरू कर् यो। इणरै साथै ई वै आजादी रै संघ्रस मांय जुड्योड़ा ई रैया। सन् 1931 में जयपुर में प्रजामंडल री थरपणा रै बगत वै अध्यक्ष पद माथै चुणीज्या। इणरै पछै वै 'अखिल भारतीय देशी राज्य लोक परिषद् रा प्रधानमंत्री ई बण्या। आजादी रै बगत अर राजस्थान रै ओकीकरण रै बगत शास्त्री नै मुख्यमंत्री पद माथै चुणीज्यौ। इण भांत सूं राजस्थान रा पैला मुख्यमंत्री बणनै रौ गौरव हीरालाल शास्त्री नै मिल्यौ। हीरालाल शास्त्री राजस्थान रा आगीवांण सुतंतरता सेनानी हुवण रै साथै सांतरा सिक्षाविद् अर कवि ई पण हा। आजादी री मुहिम रै बगत वां जनता नै इण संघ्रस में सामल करणै सारू राजस्थानी भासा री ढूंढ़ाड़ी बोली में सांतरी कवितावां रौ सिरजण कर् यो जिकी घणी लोकचावी हुयी। आं कवितावां सूं जनता माथै सांगोपांग असर हुयौ अर साधारण किरसौ अर मजूर वरग इण मुहिम मांय घणै उछाव साथै सामल हुयौ। सिक्षा खेतर में वां री थापित कर् योड़ी संस्था जीवन-कुटीर आज देस-विदेस में नारी सिक्षा में मौकळौ नांव कमायौ है अर आजकालै वनस्थली विद्यापीठ रै नांव सूं जाणीजै।