(1)
धूप, धुंऔ, धुंध और धूळ ज़िन्दगी
अणकूंत्यां जनमां री भूल ज़िन्दगी
घणै-घणै जतन सूं सींचियौ गुलाब
डाळ-डाळ उगी या बबूळ ज़िन्दगी
(2)
दूर-दूर आस अर निरास ज़िन्दगी
समदर री अणबुझी प्यास ज़िन्दगी
रात-रात पाणी सा सुपना संजोवती
दिन ऊगां अणमणी उदास ज़िन्दगी
(3)
लहर-लहर उछळती उछाळ ज़िन्दगी
ताळ नै तलासती कुताळ ज़िन्दगी
गैली या डगर-डगर डोलती फिरै
डंकै री चोट पै सवाल ज़िन्दगी
(4)
घाट-घाट घूमती उचाट ज़िन्दगी
अणबांच्यौ मिनख रौ लिलाट ज़िन्दगी
राजा अर रंक री अेक दिखै है
पण कोनी इतरी सपाट ज़िन्दगी
(5)
सबद-सबद सौरम रौ वास जिन्दगी
सांस-सांस काळ रौ कपास ज़िन्दगी
अणगायौ सांमवेद हिचकी रौ
आंसू री रांपी, रैदास ज़िन्दगी
