हिवड़ो अमूज्यो म्हारो आंसूवां नै रोक साथी,
आंसूवां नै रोक रे।
लाजै है म्हारै कुळ री मान बड़ाई।
लाजै है चूड़ौ धण रो, मायड़ री कोख रे॥
आंसूवां नै रोक रे।
राज पाट लियो म्हारो रोयां नी लागै सारो।
हाथै लगाया दाव द्यूं कीनै दोस रे॥
आंसूवां नै रोक रे।
पळ्टी पुराणी रीत सुख री आवै नी नींद।
वैरी उडावै मौज म्हारै घर में शोक रे॥
आंसूवां नै रोक रे।
रण में बडेरा जूझ्या म्हे तो घरां अमूज्या।
घरां में बोलै है घग्गू खड़्या हंसै लोग रे रे॥
आंसूवां नै रोक रे।
आंख्यां में आवै लोही दीसै न उपाव कोई।
कळपै है जीव म्हारो सुहावै न भोग रे॥
आंसूवां नै रोक रे।
जीणो मरणो है धूड़ खाणो पीणो है धूड़।
भूल्योड़ो वैर न ल्यूं तो जलम्यो नाजोग रे॥
आंसूवां नै रोक रे।
