औज्यूं पींपळ री छांव है
मघली-जगली नांव है
बूक हथाळ्यां ठांव है
हां जी, ओ म्हारो गांव है।
जद दिन बिसूंजै
जगै दिया
चांद रै चानणै
टींगर खेलै दड़ी गेडिया।
बिजळी रै खम्बां भैंस बंधै
तारां री बणै तणियां
बिजळी रो खाली नांव है
हां जी, ओ म्हारो गांव है।
करसां बोवै साऊ खावै
बापू रै नारां रो
गांव मांय खाली नांव है
बिजळी कड़कै ठण्ड पड़ै रे
करसां खसै खेत मांय
खातां मांय जमींदार रो दांव है
हां जी, ओ म्हारो गांव है।
अंगूठा री नीं सूकै स्याही
मघली जाई जगली परणाई
मां गैणा रख रिपिया ल्याई
साहूकार री बै’यां मांय
म्हारी संगळी पीढ़ी रो नांव है
गांव सगळो पड्यो अडाणै
बैंकां रो खाली नांव है।
क—मानै करजो
ख—खेतां खसणो
ग—गरीबी
घ—घरहीन
इस्सी बारखड़ी
गांव री चौपाळ है।
पांच स्यूं पच्चीस रा टींगर
खेतां रो’यां चरावै लरड़ी
माठर फिरै सै’र मांय
गांव मांय स्कूल रो खाली नांव है
हां जी, ओ म्हारो गांव है।
अणभावणा
अणखावणा
बणै नेता बोटां रै ताण
ठग ठाकर है म्हारा
गेडी रै ताण।
अडाणां री कहाणी कै
खेत दबाणा री बाणी दै
घेंटी मोस बोट नखावै
जीत परा फेर ढोल बजावै
हां जी, ओ म्हारो गांव है।
अंटी ढीली खेत पाधरो
अंटी काठी खेत धोरां पर
अळगो-आंतरो
मन्तरी री सुपारसां
खेत मिलै सांतरो।
खेत खतौन्यां
हक हकूकतां
जमींदार रै हाथ मांय
गांव बापड़ो फिरै गूंग मांय
चारूं कूंटां पटवारी रो दांव है
हां जी, ओ म्हारो गांव है।
