चांदणी रूपाळी, उतरी चांदणी।
चांदणी जद उतरी कांकड़-कांकड़ खेत-खेत।
बाथां भर-भर मळक्या काळा ढेकळ भूरी रेत।
उतरी चांदणी।
चांदणी जद उतरी सरवरिया की तीर-तीर।
झळमळ का तारां सूं जड़ग्यौ नरमळ जळ कौ चीर।।
उतरी चांदणी।
चांदणी जद उतरी बादळिया की कोर-कोर।
रूपां बरणी मूंडा होग्या, काजळ बरणी मोर।।
उतरी चांदणी।
चांदणी जद उतरी बछटी गणगोरयां के गांव।
कंवळ-पांख होठां पै डघड्यौ सांवरिया कौ नांव।।
उतरी चांदणी।
चांदणी जद उतरी गीत रचण्यांन की पोळ।
रागण्यां का पग में बंधग्या गीतां का रमझोळ।।
उतरी चांदणी।
