पग डांडी रा मोड़ मिनख रे
उणियारे री आरसी।
अण होणी नै नमस्कार है
होणी नै कुण टाळसी
बीज में रूंख रो रूप पळै
पण कुणसै सांच ढाळसी
चेते रा चितराम सजग
सुण-कुण काया नै ठारसी॥
आभो है अणजाण
धरा पर आखर कंवळा है
चूलै अणबूझ आंच
चेत रा मारग अंवळा है,
भभक उठैली हाय-लाय
जद कण-कण मन रो धारसी॥
बळती चाली पवन
बिरछ रा पीळा पड़िया पात
फळ मान्दा कद बीज बणैला
माळी करियां घात
चेत मानखा—राख रुखाळी
लोग मिनख नै मारसी॥
जगत तारणी मिनख मारणी
सगती दावैदार है
म्है जीवां से काल मरेला
आ दुनियां बीमार है
घर रा लोभी लाभ देखसी
बिना मिनख रै सारसी॥
बाळू-भींत अकल री ओछी
पल भर री है पावणी
मान करै आ मे-आंधी रो
लागै है अळखावणी
काठ री हांढी चूले चढ़सी
बळ-जळ आपो हारसी॥
