थारी सोगन
डांवरयोड़ी मींझर री खसबोय सूं]
तळमछतै आंगणै में
खिच्योड़ी ओळ्यां री निसकारां
म्हैं नी सुणी
उगतै सुरजी री
रेसमी किरणां सूं
उकळतै डील रा
उदास सपना
म्हैं नी देख्या
थारी सोगन
बसंत रै अबछळ गूमेज सूं
मदमाता फूलां री
रूपबसी मुळक
म्हैं नी निरखी
कोडीलै फागण री
दैचाळ सूं थिरकतै
डील री मरोड़
म्हैं नी ओळखी
थारी सोगन
ठंडी रात में
धूजतै काळजै री मनस्यावां
म्हें नी परोटी
उफणतै समदर रै झिकोळां मांय
गळबांथां मिल
संपाड़ै री उमीद
म्हें नीं संजोई
थारी सोगन
सोचूं
अै कांई म्हारी गैलायां ही?
