ठाग पर बंध्योड़ा-सूदा सांसर
काळै-काळरो कलेवो
साफ नाजोगा निकाम
ना दूदरळै ना दूद रळावै
सूखै हाडकां सूं दूद।
कठै सूं आवै
घणै कामरा हा
इतिहास परतख बतावै।
कदै-कदास बांटौ चाटौ
बोदी कड़बी रा दो चार सूखा डांखळा
बां’रै ठाण में राळनो
मिनखा चारै री पिछाण
पूरै मानखै री मेहताऊ मांग है।
हाण हार्योड़ा-तिगटूट्योड़ा
बेसक्यां पड़्योड़ा अे सूदा सांसर
जद-कद भां-भां अरड़ावै
समूचै समाज रो
सणकारो निसर जावै
ना आगैरा-ना-लारैरा
मिनख री चिंता छोड’र जावै तो कठीनै जावै।
आगोतर री चिंता करणिया
सुरग में ठिकाणो ठावौ करण नै
आपरै नामूज खातर
खोल तो दी है गऊशाळावां
सूदी गायां खातर—
नागड़िये खुरसंडिये, सांडां वास्ते।
सांसरां री महताऊ करणी रा मीठा फळ
भाग-जोग
लावारिस सांसरां रो कुण धणी
मिनख पणो-धाप’र हीणो
कठै धार हिये री गमगी हीरकणी।
