अेक
बगत पंपोळतै
हाथां सूं
छूट’र
आंगणै बिचाळै
खिंड्योड़ै बुगचै नैं
अंवेरती दादी माथै
काटक’र पड़ी
बीनणी :
‘कांई धर् यो है
लीरम-लीर बुगचै में
क्यूं फिरोळती रैवो
आखै दिन चिथड़ै नैं!’
कांई बतावै दादी
ओ बुगचो
कोनी फगत
फाट्यो-पुराणो-पूर!
इणमें :
गळगी जूण
ढळगी हाण
बळग बाट
अर रळगी ओळूं री
आछी माड़ी ओळ्यां!
जका नैं
सबदां री नीं,
रैवती दरकार
फगत प्रीत री।
दो
बुगचै में फिरोळती
ओळूं रै अकूत खजानै रै मिस
सौ’जी सागै खेचळ करती
आंख्यां री थळी तांई
नीठ पूग्या
बे-बेमार आंसू
सूक’र मरग्या
अेक छिण में
दादी रै खुरदरै मूंडै री
सांवटीजती सळां बिचाळै
गमणै रै डर सूं।
तीन
पळपळाट करती
गोटाकिनारी री लगा’र फूंदा
दादी रो बणायोड़ो बुगचो
कोनी फगत
मखाणा मिसरी’र
खारक राखण रो जुगाड़।
इणमें :
भर राखी है
जमापूंजी
जीवण रै
करड़ै-कंवळै दिनां री
ओळूं रै औळावै।
