तारां छायोड़ी रात
सुरजी ऊग्या
म्हारै आंगणै
उजास सूं भरगी
म्हारी आंख्यां
गुनगुनी महक सूं
महकियो
म्हारो ओ आंगणो
पीढ री गांठ
सूं निकळ
नेहचै री तितळियां
उडी म्हारै
आसै-पासै
थनै देखियो तो
लागियो कै
ईसवर रै आसीस सूं
म्हारी गोद सजी है
जीवण रो
संदेसो देवती
थारी अधमिची-सी
आंख्यां री चिमक
म्हारै जीवण री
कौर माथै
जुगनुआं-सी सजगी
थारी रूई रै
फूबै सरीखै
पगलियां रै
अड़ी जद
म्हारी आंगळियां
हुयी थनै गिलगिली
पण म्हारी हथेळियां
हुयगी पवितर
लियो जद
थनै म्हैं गोद
हीरा-मोती सूं
मूंघी हुयगी
म्हारी गोदी
आस री डोर
पकड़ावण नै
थूं आयो
म्हारी झोळी मांय
वा स्वाति नखतर
री रात
मिळियो थूं मोती सरूप
जलम सारथक कर दियो
गिगलिया
थूं आयनै
म्हारी कोख में
थूं आयनै
म्हारी गोद में!
