तूं होळै-सी सहलाई
म्हारी पलक-पांखड़्यां नैं
गीतां सूं नहलाई
आंख्यां, होठां अर
आंगळिया नैं
माथै सूं गोडां तांई संवार्यो
कुदरत री कंवळास नैं
पण कांई
थोड़ी-सी सौरम ई पाई?
म्हारै हिड़दै में खिलतै कमल री?
या फेर
चुभण ई बरदास करी।
म्हारै दिमाग में उळझी
कंटाळी झाड़यां री?
नीं,
स्यात् उण सूं ई बचणै सारू
म्हनैं म्हारै अपणापै सूं बहकावण
पूलां अर पत्तियां सूं
ढक नाख्यो
तूं
म्हारै
वजूद नैं।
