सपनां री तिरस बुझ्यां पैला ई
नींदड़ली री सांस निसरगी!
दो मुळकांण उधारी देता,
सांसड़ली गुम्मेज करै ही
जीवण मारग प्रीत बांटता
गैली कितरी जेज करै ही
मालण हार गूंथती रहगी
अर फूलां री बांस निसरगी!
नहीं लजाई हियै—बजारां
प्रीतड़ली रौ मोल बतातां
सोनै-चांदी रै बाटां सूं
जीवण-मोती तोल करातां
मन रौ मोल अंकीजण पैली
तन री घर सूं ल्हास निसरगी!
हियै—तीरथां किता जातरू
बिन चिरणामत पाछा टूळिया
प्रीत-पतासा मन रै मिंदर
माटी रै मटकां में गळिया
मिन्दर रा पट खुलियां पैली
दरसण री सै प्यास निसरगी!
तन-पूजण मन-समझावण में
गैली घणी उंवार करै ही
हेत-प्रीत रा गीत सुणण री
तूं मौड़ी मनवार करै ही
बिध-बिध गीत रचावण आळी
हियै मांयली फांस निसरगी!
