थारी आंख्यां री आभा
म्हारी कविता सूं कम कोनी
आपणीं इणा आँख्यां में
मत उतारो रगत
इणा आंख्यां में बसै
मायड़ री ममता
पिता रो आदर
साथण रो अनुराग
घरवाळी रो प्रेम
भाई रो हेत
बेटा रो लाड़
बेनड़ली नै राखी रो इकरार
इणा आंख्यां में बसै
बेटी नै बिदा करता
ढुळकता आंसूड़ा
जो देवै परमाण
काळजा री कोर नै
आसीस दे’र
दीठ उपरांत पुगावण रो
म्हारा साथीड़ा
इणा आंख्यां में मत उतारो
नफरत नै
बदल दो नफरत नै
प्रेम रा आंसूं में
म्हैं सांच कैवूं हूं
म्हारी सुणों
थारी आंख्यां री आभा
म्हारी कविता सूं कम कोनी
थारा आंसूड़ा नै बैवण दे
उवारै नांव
जो दूसरा नै बचावता-बचावता
खुद शहीद वैइग्यो
उणारी बिगत
इतिहास री पोथी में
किणी पानां में कोयनी
समै री रेत तळै
गमग्या वै मिनख
जो आपणां-पराया नै बचावण में
आपणां बण’र शहीद हो गया
आंख्यां री आभा
अमर हो जासी म्हारा साथीड़ा
क्यूं—कै—
उणामें बसैलो हेत, प्रेम
अेक दूजा रै खातिर
अेक दूजा रै खातिर।
