पोथ्यां रा पानां पंपोळतां
कितरा ही बरस बीतग्या
पण किसणी पानै नै पाछौ
बांचणौ नीं चायौ
कांई ठा क्यूं तौ म्हारी
समझ ही सांकड़ी है
अर क्यूं सबदां रै समंद में
गोता खा-खा’र म्हूं ही
कोई सबद रै अरथ में समायगी
अर असैंदी व्हैगी
किणी बीजै सबद सूं
पण मूठी में जकड़ियोड़ी है
केई अपचळी भावनावां म्हारी
जाणूं हूं कदैई वै ही किणी
सबद में ढळ जा अर म्हनै
अेक अबखी ओळी बखा नांखै
जद तक कोई भावुक
सीरी नीं बणै
म्हैं भासा अर साहित में
अड़वौ लखाऊं।