पंगा में पड़ी है
स्त्रवणी धरम री सांकळां
अर समझणा लोग इंछै
म्हां दौड़ा,
जमानै री दौड़ में
आगै निकळ जावां।
म्हांणी भुजावां नै काट’र
वै आस राखै—
म्हां भावी रै रूपाळै
मिंदर री सिरजणा करां,
जिणमें वै आपरी
टकसाळी लिछमी री मूरत री
थरपना करै।
म्हाणी कनपड़ी माथै करै वै नेम सूं
आपरै अधिकारी हथोड़ै री चोट
अर हुकम देवै—
म्हां वांरी मौज सारू
नफै री योजनावां घड़ता रैवां
पूरी करता रैवां मरता रैवां
कैड़ा है वै नाजोगा निबळा
धनबल वाळा लोग
जिका करनै म्हांणी हत्यावां
म्हांणां मूड़दां सूं मांग करै—
म्हां
जीवता बळवान
अकलमंद मिनख री भांत
वांरा काम साजां— साजता रैवां।
सोनल डोर्यां रै स्यारै
कठपूतळियां ज्यूं
ल्हासां नै उछाळ-उछाळ’र
करै है दरसावणा
बण्योड़ा मदारी
अै ल्हासां नै नचावण वाळा।
मौत मार खाय’र ई
कठपूतळियां बण्यां पछै ई
म्हांणां चैरां माथै पसर्योड़ी मुळक
लोप व्है कोनीं
देख’र जिणनै—
वांरा दिन तौ कांई
रात ई कटै कोनी,
बेचैनी बापड़ी बधै है
घटै कोनीं।
