म्हैंं अन्नदाता कोनी
म्हारै नांव आगै लगायोड़ो
आप रो अलंकार पाछो करूं
दाता तो आप हो
सगळी भांत रा दाता
मौत रा दाता
जीवन रा दाता
म्हैं तो
मौत अर जीवन रै बिचाळै
पीसीजण वाळी चीज हूं
भुरभुरी जमीं पर
म्हारै हळ सूं
काढ़्योड़ै ऊमरा में तो
सदियां सूं
करजो ऊगतौ आयो है
अन्न तो
आप रै संगमरमरी महलां में ई
उगै है सा !
आप हो अन्नदाता
अन्न मसखरो हुवै
ईं सारू ई
इण बरस आप
म्हारै साथै
अेक ठाडी मसखरी करी है
कै आप म्हारो
करजो माफ कर दियो
आप दाता हो
आप तो इण सूं ई
भयानक मसखरी कर सको हो
आपरै डील री
रूखाळी में
मरण वाळै री ल्हास पर
सहीदी चिट चेप र
उण री जोड़ायत री आंख सूं
ढळता आंसू
बठै रा बठै जाम कर सको हो
अर जाम कर सको हो
म्हारै फेफड़ां में जावती आक्सीजन
जे म्हैं
म्हारै ऊमरां में
अन्न उगावण री आफळ करूं I
