राता-राता खड़ियौड़ा खैड़ा
राता गौरी रा होठ!
रातौ-रातौ ऊगतौ परभात
रातौ-रातौ जलमतौ डावड़ौ!
रातौ-रातौ चड़-चड़ वाळौ चूनारू भट्टौ
राता-राता गौरांदे रा, मैंदी वाळा हाथ
रातौ-रातौ आरंण सूं निकळै फाळियौ!
रातौ-रातौ मिनखां रौ मोह
रातौ-रातौ गुलाब रौ फूल
राती-राती मूठीयां मजीठ
रातौ-रातौ बासदी रौ रंग!
राती-राती ब्यावां माया मांडणी
राता-राता गेरूं रा भाखर
राता-राता करसां रा पोतिया
राती-राती सावण री डोकरी!
राती-राती बींनणी री चूंदड़ी
राता-राता माटी रा बेवड़ा
राती-राती बाजूबंद री लूंब
राता-राता केरां रा फूलड़ा
राती राती मुरायां मुळकती!!
