सदी रो सब सूं नाजोगो बरस इक्कीस
आदमी सूं आदमी री
आत्मा नीं मिळ सकै
बंद घरां मांय खावतै-खावतै
अैधी व्हैग्या मिनख
लपझप करतो शरीर बारली हवा वास्तै
आलमारी मांय पड़्या पैन अर कापियां
बिखरगी स्याही कापी रै कागदां माथै
बणग्या कोरोना जैड़ा फोटू
बांरै हाथ लगावणो
एडवाइजरी रो हुक्म नीं मानणो हुवै
कियां लिखस्यां लाॅकडाउन रो हिसाब
कामवाळी रै नीं आवणै सूं
घर रा खूणा मांय पड़्या है जूठा बासण
अेक खूणै सूं दूजै खूणै री
नीं रैयी दो गज दूरी
बाजण लाग्या बै बिना मंज्या बासण
रंग बदळता खूणा
जूठा बासणां रै भार सूं
धसण लाग्या
दिनुगै सूं सिंझया बंतळ करता च्यांरू खूणा
कामवाळी री अरदास करै
अण सैवतै भार सूं
लाॅकडाउन री धार माथै
इतरा आघातां रै पछैई
बचग्या है घर रा खूणा
