म्हां तौ साव मामूली हां जीसा
म्हां सूं
मोह करौला कांई?
हां, म्हांनै ठिकाणौ है,
जीसा
मामूली सूं थांनै सूग आवै
गोदियां रमाय लौ म्हांनै
लाळ सूं,
भरण दौ थांरा गाभा
थारै कांधा री डाळ माथै
पाकण दौ म्हांनै
पूंछौ चाळ सूं
म्हांरी आंखियां रौ गीड
जे पै’ला ई डाळ सूं तूटगा
तो काचा नै, खारा रैय जावांला
सैं पदारथां रा गुणां नै छोड
व्है जावांला रसायनां रौ घोळ
जीसा,
तो-ती, तो-ती करौ बातां
कड़ियां चढ़ रळियां करण दौ
इण उजळाई नै
मैल सूं मैली होवण दौ
इयां-व्हियां-ई-म्हैं
मामूली नीं रैवांला।
