चालण रो वर दे मां मारग कांटां सूं भरपूर।
पग-पग कांटा जग में दीसै,
कांटां में कई फूल नीपजै।
कांटां री दुनियां में माता क्यूं जाऊं मैं भूल
चालण रो वर दे मां मारग कांटां सूं भरपूर॥
हालण लाग्यो जळ थळ सारो,
झोंका दे बायरियो प्यारो।
ऊंचा महल उबासी लेवै झूंपी झेरां पूर॥
चालण रो वर दे मां मारग कांटां सूं भरपूर॥
आज सांच रो मारग दीसै,
वीर सूरमा म्हनै उडीकै।
परभातै री नींदड़ली हमैं मत कर तूं मजबूर॥
चालण रो वर दे मां मारग कांटां सूं भरपूर॥
अेक जीव है अंग हजारों,
छोट मोट है भेद कठै रो।
घर रै गोधम गजनी रै कांटै, पीथळ खोयो नूर॥
चालण रो वर दे मां मारग कांटां सूं भरपूर॥
सतियां सत कांटां बळ राख्यो,
कांटां चल राणै प्रण राख्यो।
हूं तो माता करणो चाऊं कांटां रो मद चूर॥
सुख करतां दुख आवै आण दे,
जगहित शिव ने जहर पियणदे।
धर्म प्रेम रा गीत गावतां आवण दे तिरसूल॥
चालण रो वर दे मां मारग कांटां सूं भरपूर॥
