केई बरसां पछै
इण बात री ओळूं आसी
जद आपां आप-आपरै
मुकाम माथै पूग जास्यां
जद होस्यां अेकला
सागै
बीत्योड़ी बातां चेतै आसी —
सागै-सागै पोसाळ जावता
अेक-दूजै नै
देख’र पाही चूंचावता
इण बात री ओळूं आसी।
गूंगा नैं चिड़ावता
खेजड़्यां रा खोखा खावता
चालतै गाडै लारै लंबूटता
इण बात री ओळूं आसी।
अेक-दूजै नैं कूटता
सागै-सागै किन्ना उडावता
धोरै माथै बैठ’र
रेत रो घरकोलियो बणावता
बिरखा आवती
सगळा छोरा भेळा होय
खनैड़ा मांय न्हावता।
