थेवड़ां री रिंद रोई सूं नीसरूं
तो धड़क सूणीजै,
कोई ऊंडी गैरी आवाज सूणीजै
भाखरां री रड़क मांय,
कैवती बात आपरै हियै री!
म्हैं सुणूं, बूझूं,
सागै-सागै बैवूं आंगळी झाल्यां...
भाखरां रा खिरता रेवड़ा,
ज्यूं बात करतां-करतां चिटकावै
आंगळ्यां आपरी!
आडा-ऊभा-तिरछा कूब निकळ्या सैंतीर
आपरै अडिग उभण रो इतियास बतावै...
समै री गत सूं मूगत आं थेवड़ा री
धूजती-टूटती बोली
भीजी पलकां सूं सुणूं हूं, समझूं हूं!
आपरी भळकती पिछाण नै झुरती वां री टीस
धूड़ बणनै री गत सूं पैली,
अमोलक सीख सूंपणी चावै भविख री जमात नै
समै री गत रा आंटां अरथांवती..!
कदैई निसरौ किणी थेवड़ रै पाकती सूं
तो पल-छिण रुक जाया उठैई
'ठेठ उं हेठ' तांई,
सै मरम समझावती,आ परतख आरसी है समै री!!
