1
कोचरड्यां मांझळ रातां
कुरळावै ठालीबूली
तपतै पसवाड़ै बळती
मनस्यावां ह्वै गैली
सीली सारण छाती नै
ओळूं लावड़ली सूंतै
बळदया बोदोड़ा दिन ह्वे
खोजां सूं मन्नै कूंतै
इचरज ज्यूं पसरायां पड़ियो
असळायां ज्यूं भांग्योड़ो
हूं बळूं ईसको ह्वे ज्यूं
दिन पोचां रौ टांच्योड़ौ
सै म्हारा तोता दिन वै
छांग्योड़ी डाळ्यां जीयां
हूं सूंनै कांकड़ ऊभी
कीं गिण्या छुरंगा लीयां
मोरया बै छत्तर ताण्यां
नीं नाचै गांव-गुआड़ां
अै किणनै देख्यां चढसी
आंख्यां पांख्यां तीं आड़ां
हूं किण गळपोट्यां चढियां
झै-झै रै ऊंट्या कैस्यूं
हूं झेरां रै झपकां में
किण खूंअै माथो देस्यूं
कै काळ लाटसी क्यांनै
मनड़ै री साखां छानीं
री किस्सी, जोर दिखायां
ल्यै लार रियोड़ी वानी
मनड़ै री धोरा धरणी
ओळूंडी ह्वे बगूळ्यौ
चोटी नैणै-गणै तीं
मरमैं भंव चोटै चूळ्यौ
सुख रा रोजड़ल्या चिमक्या
सै भाज्या उन्नै - बुन्नै
हूं चमगूंगो ह्वेयोड़ौ
जोवै हो कैठा कुन्नै
सुध कोछी में छापळगी
खरगोस्यै जीयां ह्वेनै
वनवागर ओळ्यूं-दोळ्यूं
नाचै हा ठमका दूयेनै
मिंदर री स्येवा सागै
गंडकड़ा पाड़ै हेलौ
कंठां गिदगिल्ली चालै
आंख्यां सूं चालै रेलौ
थूं पंज्या गिण अट्ठारा
कैतो 'ओ हुचरय्यौ अटकै
पटकै वीस्यौ इक्कीस्यै
खिरगोस्यौ मूंडै लटकै '
कुण पातड़ल्यां बंवळ्यै री
बांधैलौ परगां म्हारै
हूं कीयां छिमछम नाचूं
कुण आसी भाज्यो लारै
कठकोरो करौ लाग्यौ
ओ गेलै वैतां म्हारै
चिमकूं बावड़ नै जोवूं
सागाळी कद्वै सारै
बातां में रातां जाती
हूं छाती चिपियां रैतौ
हूं 'पछै - पछै' कैनै
बातां हूंकारा देतौ
कूबेळय्यां दयै गोफण में
भाटै ज्यूं वायौ मन्नै
सै म्हारा म्हां सूं भाजै
हूं बरनाटा दयूं जुन्नै
टांचा लाग्योड़ी ठोड़
ज्यूं गूंद बणै बांठां में
बीयां रिस पीड़ां भेळी
ह्वे छंदां रै आंटां में
पीड़ीजूं पोलै कांकड़
ज्यूं ऊंदरिया बिल घालै
कै ओळूं कीड़ीनगरौ
मनड़ै नै चूटै चालै
मनस्यावां लीलौ पालौ
सै झाड़बड़ां रै नीचै
निसरी अणखाणी पायां
ओळंड़ी ज्यांनै खींचै
मनस्या रै सगपण सारू
सुख साम बुढापौ चाल्यौ
फिर खोज मुलक में मांड्यां
कुण टेवै आंटी घाल्यौ
हूं किण माचै रै नीचै
व़ड़ लातां मौरां दूंलौ
किस्या हाथां में आतां
नैड़ै पागै लूंबूंलौ
मुलका रा स पिछतावां
भेळा ह्वे-ह्वे नै रोवौ
आं गालां माथै बळता
छपियोड़ा बाच्या धोवो
व़ाजो व़ाजां बीं सारू
धोरा धरणी में रमगी
जींरी रागां, कै म्हां तीं
जीरै कंठां में जमगी
ह्वो स्याई चूसां सैंठा
कवियां री कलमां छिकसी
ईं तोतलियै री ओळ्यां
मूंगै मोलां में बिकसी
कज्जावां कंठां चेतौ
थोथां में सोर भरीजौ
अेकर फाटण री मन में
नाड्यां म्हारी सिलगीजौ
आंख्यां रौ सूखै पाणी
कत्ता दिन औरूं रोस्यूं
अै पीड़ां पाच्यां जावै
हूं क्यांसूं आंनै धोस्यूं
गेलै ज्यूं पसरयां लांबी
ओळू थारोड़ी जदै
हूं ल्यूं पसवाड़ा जोवूं
बा तर तर लांबी वदै
जे नैण थाक नै लागै
हूं सूतौ वैलूं थन्नै
कर ल्यूं बावां नै लांबी
कुण लेवै बाथां मन्नै
थां धांस्यां तड़को ह्वेतौ
घट्ट्यां वैती घर-घर में
अब्बै पसवाड़ा, तारो
रै-रै जोवै बर-बर में
बै सावण री डोकरियां
धुपियोड़ा धोरां चिळकै
ज्यूं मन रा नखल्यां माथै
ओळूं री टक्यां पळकै
लै चाल खळै में चालां
वंग रौ व़ायरियौ व़ाजै
सगळा उफणै आपांळै
पण त्याव छाजलौ लाजै
कुण पड़ै बचावै, जागण
कुण घरां दिरावै गावै
सुण व़ास मंड्योड़ी सपता
कुण ऊंट्यै नै झैकावै
कूं सांची सैण जड़ां सूं
वाडै जे आवै जोवै
म्हांळी आंख्यां री टप-टप
माथै औ खिलका पोवै
लै टेम दुआरी ह्वेगी
हूं वंटौ ल्यादयूं थन्नै
चरियां अपड़ायूं दू-दू
पाछी अपड़ाज्यै मन्नै
खांडोड़ी गाय उडीकै
नीं रोटी ल्यैवै म्हांसूं
आ लखणां री लाडेसर
ईंनै समझावां क्यांसूं
बो हुचरय्यौ गंडक वूड़ौ
ह्वेगौ ठीडै रौ ठीडै
कुण मोरां नै पम्पोळै
कुण कानां 'तू-तू' कूडै
हूं तिरस आंख री सूखा
कंठां रौ थूक अड्योड़ौ
जक्कौ गिटण थुंकण रै
कळपूं पचणै पड़ियोड़ौ
कुण चोज करै जीमातां
मूंडै रा गास्या देवै
राफां पूंछै, हत्तेळ्यां
पड़ता टेरां भर लेवै
कुण फूंक भरै मूंडै में
दिरवावै म्हांसूं मुक्यां
अब्बै कुण सोदण आसी
हूं क्यांनै बैठौलुक्यां
कुण खुद रौ स्यापौ म्हारै
माथै मेलै कै ओपै
ओ मन गैळीज्यौ बोदी
बातां थेथड़ नै रोपै
म्हारी आंख्यां रै सामीं
थारौ उणियारौ नाचै
पाटी फूट्योड़ी ओळूं
कक्को केवळियो बांचै
थारै जाबा रै पच्छै
थारौ म्हारौ करबा में
लाग्या सगळा, नीं धापै
धणयापै नै भरबा में
म्हारी पांती में ओळूं
आपै रैगी, हूं धीज्यौ
मन्नै चाइजै कीं नीं
थे सै कीं गिण-गिण लीज्यौ
ओसाण किनै सै देवै
खुद रै फाट्यों में कारी
बोलै बतळायां मोसा
कै 'थारी बातां न्यारी'
कींनै बतळाबा ठामूं
खुद नै खोलूं कीं आगै
जे कीरै कीं नीं लागूं
तो कुण म्हारै कीं लागै
अै भूण भूंअै ज्यूं भूंवै
दिन चकचूं बोदा म्हांळा
'भरियो रामा रो' बोलै
मन्त्रै टंटोळण आळा
दिन आंथ्यां टीबै माथै
कींरौ इकतारौ व़ाजै
हूं ज्यूं- ज्यूं नैड़ौ ह्वेवूं
बो आगौ-आगौ भाजै
आधूंणै सुरजी डूबै
गैरूं पसरै आकासै
ऊमर व़रसां रा कटका
काडै थाक्योड़ी धांसै
दिन हारयां पड़िया नीचै
रातां बांरी पगतळियां
सैळा, सपनांळी चिमट्यां
सूं काडै भाजी सिळियां
पण रूं-रूं रमगी जक्की
बै क्यां निसरै कीयां
रातां जे ह्वे पम्पोळौ
दिन्नां नै बाथां लीयां
ज्यूं ताल रोड़ सूखै
ह्वे ठोड़ा-ठोड़ां लीरा
बीयां छाती में पड़गा
अै लोक लकोळ्या चीरा
धरणी चांदणियों पी-पी
लूरै काडै रागोळ्यां
हूं गिया दिनां रै बांधूं
अज्जै मैड़ी में मोळ्यां
भगवान रै सळ ज्यूं
फुन्नां री फूटण ढीलौ
हूं होटां फुरफुर हळवौ
हूं आंसूं ज्यूं वादीलौ
2
ओळूड़ी घालै घूमर
कड़ियां काढू कटका
रै - रै अणचेती आंख्यां
झीणा - सा खावै झपका
दूली रै नैणां चिरम्यां
दयै लैरयौ, कंठां भूंगौ
पाजेबां पैरा सीकां
ये मिलतो ह्वे तो गूंगौ
कुण बींनै लेवण आवै
बा कीरै सागै जासी
सूनी सेजड़ल्यां रोवै
कुण ओळग बींरी गासी
ज्यां हाथां सूं सिणगारी
बां हाथां खींचूं बागा
सज कीकर म्हां सूं आवै
मन कंवळौ छोडै जागा
बा मुकलावळली बैठी
भरचंगौ जोबन लीयां
हूं आंख्यां भर-भर जोवूं
रांडापो कटसी कीयां
माथै री टींकी कट्टै
राखड़ली लटकै नीचै
काजळ व़ैवाती चूड्यां
झाड़ै, माळां नै खींचै
दिन धरकूचां धरमजलां
चाल्या हूं दीठी ढूली
अेकर भागण रै भेखै
नीसरमी ठालीबूली
म्हाराळी ढूली जक्की
कद्वै सिणगार उतारयां
बैठी, बा नखल्यां सिखल्यां
तीं जोली पाछी भारय्यां
हूं घाल मोरकी बींनै
ल्ये काण - कायदै हाथां
'औ सांग करै क्यूं गैली
अै काण भांगणी बातां'
चिरम्यां रा डोळा डौडा
कीनां कर मुळकी मधरी
'क्यूं कूड़ी चालां चालै
हूं बिन्यां कंथै कद री
जददूं ओळंडी लागी
हूं बडभागणती ह्वेगी
रातै सपनांळी फांफां
आ कानां फूंका देगी
हां जाणूं सैसूं बातां
थारै निपजै समझावै
पण मन्नै कै थूं इतरी
बेळ्यां भुगतण आवै
अै काण - कायदा कीं री
नीं काण राखबौ जाणै
औ मिनखां खातर व़णिया
मिनखां सूं डौडी ताणै
नीं कंवळा ह्वेवै सागै
नीं सैळासै सांसां नै
दय्यै-दय्यै दावणियां मेलै
थां मोल्यां रै हाथां में
जा-जा ओळं ओळावो
म्हारै जीबा रै सातर
जे घणी करै नीं दीज्यै
खांदौ, ह्वे उत्तरपात्तर'
आ कैय सांसड़ी सारयां
सिरकी आंगणियै नाची
हूं पगल्यां सूं मखियोड़ी
पड़तोड़ी लीकां बांची
कद बांच लिकोळ्यां मत्तै
पगल्या तिसळ्या म्हारोड़ा
गणौं गाजंतौ ठमका
दीनां बिज्जळियां तोड़ा
3
होटांळी मुळकण जमगी
कै ठा कींरै कैणै में
कै झम्प बीजळी ठोड़ां
रैगी ह्वे ज्यूं गैणै में
कीं वैम घुळे ज्यूं लागै
धरणी री रूं-रूं घुळतौ
म्हारी नाड्यां में जाणै
व़ै मैण तपंतो गळतो
रूसां मत आज्यां रम्मां
लै रामत मांडां व़ाड़ै
कूं रूंगटियां नीं खास्यूं
नीं कूड़ौ चढस्यूं आड़ै
जे कुबदां करतौ दीसूं
कानां बिच्चाळै करजै
माथौ, सासू रा झुंपा
तावड़ियै बंधण दीजै
कै कैवै जक्कौ रम्मां
कै हींगदड़ौ के झुरणी
थूं चढज्या पैली पाळै
हूं ल्यूं आगूंचां पिदणी
पण लूकमीचणी सोगन
खा कूं सज कोनी आवै
यूं कैड़ौ खुणियां सूदां
हामळतां, अन्त लिरावै
सुण जे परभाती बेळ्यां
गैणै दारू नीं पाड़ै
आरात उबास्यां लेती
क्यांसूं कायल्ली झाड़ै
तांगीजै, घुळे अमूजै
ऊठै, टूटै, पड़ ज्यावै
थुड़-थुड़ ईसां सूं कैवै
'क्यूं चिड़यां कलाळी गावै'
सै नेम टेम नै गत में
ठा नीं करै कैवण सूं
किणईं राजीपां माथै
वै अंगूठा देवण सूं
पीकां रा ह्वे राजीपा
माड़ा माड्याणी ऊंचै
किणनै कैवै रै बोला
चाळां सूं आंख्यां पूंछै
रूंखां मोरया कुरळावै
'ढकणी में ढोकळिया'
न्यूतै में नागा टाबर
अम्मूजौ सैनै तळिया
टींगर नै बोबो दय्येती
भातै भतवारण चालै
बुन्नै बै हाळी खेतां
तेजै में लूरां घालै
ठाडा पौरां धोरां री
छाती अलगोजा वाजै
छाणा चुगतोड़ी छोरयां
पोठां कूंडाळ्या काडै
मझ दोफारी में तीती
व़ाड़ा में किलकच बोलै
खेळ्यां कम्मेड्यां बैठी
भींज्योड़ी टूंचां खोलै
'टर्ररो-टर्ररो' रै सागै
अैवड़ खेळ्यां नै नापै
छीयां गंडकड़ा जीबां
लटकायां सांसां चांपै
कै दीसै सीली ठोड़ां
कीं सूंगै घुरियां खोदै
जाणै क्यूं लागै मन्नै
बै कीं गमियोड़ौ सोधै
उन्याळौ लूआं रागै
सावणियौं घालै हींडौ
सीयाळौ गूगी ओढै
चौमासौ बांधै पींडौ
रुतां रा कुबदी टींगर
ह्वे नागा नगदड़ खेलै
म्हारै नैणां दीणापो
आंरी कुचमादां झेलै
सांसां रै चूड़ीवाजै
ओळूं री ओळी चढगी
वड्डौ खायोड़ी ठोड़ा
आ बाण कबाई पड़गी
कुण चेप तासळौ म्हारै
मूंडै मांडैलौ मूछ्यां
कुण थुथकी राळ्यां कैसी
'थूं व़द ह्वे लांबौ नान्यां'
हूं किरण गोदी में बैठौ
लूण्यै रा लपका ल्यूंला
कैबौ सुण करौ होळै
हळवौ-हळवौ मुळकूंला
हूं छिळतौ-छिळतौ पूगूं
कींरी आंख्यां नै मीचूं
करै गालां नखल्यां सूं
बिमरयोड़ां लीकां खींचूं
'घम पड़तां कीड़ी मरगी'
कुण पूछ्छै कैतौ ईंयां
बीयां पोटाता सगळा
पण कुण पोटातौ बीयां
डोळ्यां लारै सूं लुळ-लुळ
'त्या-त्या कै-कैचिमकातो
हूं' कान्यो मान्यो कुर-कुर'
थांळे कानां अटकातौ
ओळूड़ी चोढै मकड़ी
चेत्ताळै मौरां घम घम
रागां कंठां री लुळवी
घम-घम में जावै रम-रम
बीं खेजड़ली रा खोका
सूखा लै आपां चालां
थूं लीजे किणियां मन्नै
पग तपसी ताता तालां
आ ऊबकल्यां मचकावां
नोड्यै रौ घालां हींडौ
छागळ ल्यां कांकड़ कुमळै
तिरसां रौ कंवळौ मूंडौ
सै संगळ्या काढै कुंट्यां
'तोत्यौ-तोत्यौ' कै छेड़ै
रोयां रोवणियों के दय्यै
आगा कर आ यूं नैड़ै
ओळं धौळी वादळियां
ह्वे छानै छीदी भाजै
कुण पिणजारौ पसवाड़ौ
फेरै, बै थमती लाजै
आ सूंईं धार में वैवै
आ कणां हांफळां हालै
आ कणां सरोदै सिरकै
आ कणां रुंदळा घालै
आ कणां तुड़ावै खेतां
थारै सागै काचरिया
आ कणां मुरावै सिट्टा
है खण आंख्यां सालरिया
ओळूं री फंकी लागी
हूं डांडी कळपूं खाजूं
कुण जाणै मधरी पीड़ा
कोरो चितबगनौ व़ाजूं
थूं 'जोगदड़ै' पसवाड़ै
जीं ठौड़ करी ही खपरयां
ओ नेम रूखाळू रुत में
बेलड़ल्यां सागै पसरयां
सुख रौ पतियारौ कोनी
बो जंजाळां ज्यूं लागै
पण दुख में ओळं रळियां
'सुख ह्वेवै' कीं-कीं लागै
दुख-सुख दोन्यां में छेती
ज्यूं बाकळ बारूंमासां
रै, पालर बूसै कोठां
तोड़ै नाड्यां में सांसां
मनस्यावां टूंचां भांगै
दरपण रै माथै ओथै
पण बैठ तणी ओळावौ
सेवट जीबा नै बोथै
कूं जग रचबाळौ सांची
ओ सेठ घुटेय्योड़ौ पाकौ
जे सांसा लेणी ह्वेवै
मरजी अड्डाणै नांखौ
सुख में कुण कोनी व़िलमै
दुख पाछ पगोळ्यां मेलै
दोयूं बारीसर आ-आ
मिनखां सूं डौडा खेलै
आ जाण बिचारूं कददै
कै छळ करल्यूं हूं खुदसूं
जे रोजीनां सज आवै
थुड़बौ रै-रै नै सुध सूं
जुग जाजम जक्का जमिया
पांत्यां पाड़ै गटकावै
बै पसवाड़ै नीं जोवै
कुण सूखा कंठ वजावै
सुख डांगांळा डेरा नै
ल्यै झपकै झपकै भाजै
दुख-बदळ बिजळ्यांमुळकण
होटां में दाब्यां गाजै
धोरां धरणी री छाती
रूतोड़ा हुयोड़ा जाणै
कै ओळूं बारामास्या
नित नूआं तंबू ताणै
बूढी धरणी में सड़फां
चालै ऊमर रै सागै
झुरियां ओळूं रै दोटै
लैरय्यां ज्यूं रमती लागै
नै कणां कणां ह्वे ईंयां
कै खाय वांयटौ फांफां
सींवां उळझ्योड़ी बांटै
किड़किड़ियां छीदी राफां
तिड़की कांगसियो करती
कुण दीठी, आंख्यां पसरै
सामीं गोटै रा तांतां
ज्यूं माळ कुस्योड़ौ निसरै
धोरां पर कीड्यां मांडै
अमणा- दुमणा जे बैठे
बै बां पर लीकां खांचै
हूं राळ सरीसी छेती
मांडूं ओळूं री ओळ्यां
चिट्टुली थाकै, ओळ्यां
तिसळ्यां ह्वेवै चल्लोळ्यां
ज्यूं पिणारय्यां री पींड्यां
पर धूळ तिसळती लागै
आ बियां सुहावै ओळूं
जे झीणां तांतां रागै
ज्यूं धूंधळ हळवो-सो
पिणयारयां री कड़ियां सळ
कड़लां सूं न्यतै बीयां
ओळूं क्यांरी क्यांमें रळ
चेताळौ चंग घुरावै
ओळूं लुळ - लुळ ल्यैलळका
फागणियाँ रूं-रूं रळगौ
'टप ठप ठप डंडिया खळका'
नीं चेत मनै हूं कट्टै
पूग्यौ सै हळवौ हलतौ
दीसै, मीठौ झीणों सो
लागै ओळूं में रळतौ
आ भाव समंच्चै चट्टै
जाणै कुण टोटी छांटा
राक्यां रा, सै खिंडियौ
लागै उतरै ल्यै आंटा
नै कणां गुंथीजै ईंयां
ज्यूं आंख्यां री कोरां में
आंगळियां गाडां दीसै
उचक्यौ उळझ्यौ टोरां में
कै थोथ भरीजै म्हां में
सांसां बळ-बळ सून्याड़ौ
निसरै, पलकां रै माथै
कायल्ली झाड़ै आड़ौ
कूं जोगी जत्ती कोनी
बै खण अपड़ीजै कीयां
हूं मिनखौ म्हांमें तीणां
भागी बित्तै नै लीयां
कीं चूक पड्योड़ौ करकै
सुध नै भेळी कर ढीली
बीं टूट पड़योड़ी ठोड़ां
मेलूं जोवण नै गेली
धुणी ढाण पड्योड़ा चालै
मिनखां रा सगळा धंधा
भाट माथै टिक-टिक
ज्यूं लकड़ां माथै रंदा
आ बात कणां जड़ मेलै
कै जीबौ टिप्पौ टोरौ
ओळावौ ल्यै-ल्यै चालौ
टिप्पै में टिप्पौ सोरौ
आ बादयै कोनी ओळूं
माथै री निपजी सारै
जे आवै गुड़ती भिड़ती
सेवट ह्वे ज्यावै लारै
कैबत रे हांटा चढ़ गौ
म्हारौ गैलापो नै हूँ
गळिया-गळिया में भटका
व़ैठाणै रा कागज ज्यूं
हूं वेगास्यां री पींडी
माथै उफस्योड़ी नस ज्यूं
हूं सोचण में उळझ्योड़ै
लिल्लाड़ै ठसियै सळ ज्यूं
खाम्यां री कूं-कूं पतरी
हूं काळां रौ टीपणियों
'वैमांळी 'कौंमा' 'ह्वेसी'
रै माथै काटौ व़णियौं
हूं सांसड़ली धीजै री
झळतौ बोबाड़ौ वैड़ौ
ओकण सागै आ गत क्यूं
ओ राफळरासौ कैड़ौ
वो भाग कऊं रै माथै
बेळ्यां री चिलमां ईंयां
फूंकै, उळझै, धोरां में
मोटर घर्रावै जीयां
उन्नै हूं ढेरै लुळ- लुळ
कातै हो सांसां काची
बुन्नै तिड़की हत्तेळ्यां
छीयांळी मैंदी राची
ओळंड़ी फुदकै डाळ्यां
किसमत फिरगांठ्यौ गाळ्यां
काडै, दिन कुबदी पोडां
बींनै चोटै दयै ताळ्यां
सैं जबरा सैंसूं धाप्यौ
सै क्या में मतलब ताणै
फुटरापौ सोदण सारू
चीजां रळकावै छाणै
ज्यू मोर खुजाळ पांखां
हळवो हेवण नै नांखै
आ बिणी तराजै ओळूं
ओळ्यां कागदियै टांकै
जद नांव सुणूं हूं थारौ
दूजां रै मूंडै निसरै
सांची कूं म्हारौ रूं-रूं
थन्नै सोदण नै पसरै
बा पांत उबास्यां छाजै
नींदीजी करै 'गटर-गूं'
कंवळै री कूंडी माथै
असळाकौ धोवै रूं-रूं
बेळ्यां रा दूदयां दांत्या
खिर ज्यावै दिन रै चढतां
आयूं आंख्यां था
बावड़ ऊमर नै पढतां
तिड़की तप धुपती ओळूं
घुळबा सूं पैली राळे
छबका, मैड़ी में सामूं
बांनै हत्तेळ्यां माळ
नीचै मेलूं हूं घालूं
छबकांळी कोरां लीकां
खोदूं लीकां में खाडा
ओळूं ओसरल्यै नीकां
तिड़की नै छीयां रम्मै
खाडांळ पाणी फाटै
छबका, ओळं ज्यूं आंसू
पड़तां चौफेरी चाटै
हूं वीस पगोत्यां चढगौ
पण तज्जरबौ रैडूलै
वै बोबां खार दियोड़ौ
चेतौ रै-रै नै भूलै
ओळूं रै ओळ्यां दोळ्यूं
भाजै चित्तै रौ चेतौ
बां बातां नै हूं जाणी
ज्यां बातां इचरज ह्वेतौ
नाकै रै दरखत री ज्यूं
ठीडै पाणी में छीयां
रैवै खप थाकै लैरयां
ओळूड़ी रैवै बीयां
4
छंदांळी साम हिंसोड़ी
ओळूं वैड़किया न्हाटा
कीं ढबियौ, रासां रिगसी
पड़ियौ खा धचका लांठा
हूं धूळ बुरीज्यौ ओळूं
ऊजड़ में कुदका लेती
रासां छंदै री कड़ियां
पड़ लार छोडदयै कैती
हूं जाणूं लार छुडासी
औ जोत टूटसी सेवट
आ बात गुणमण ओळूं
केवट सी थूं मत केवट
धणयाप करै ईं माथै
क्यूं बांधै अपड़ै लारौ
आज्यं चालै चालण दयै
धीजी काठी बेळ्यां रौ
जे हाथ वेकळू ल्येनै
पींचैलौ मुट्ठी कोरी
रैसी, वदबा नै जागा
सेवट कुस ज्यासी डोरी
इतरी ओळ्यां मांडी पण
नीं धाप लिरीजै म्हांसूं
'कीं मांय रड़कतौ रैगौ'
ओळूं कैवै ओळ्यां सूं
ओळ्यां ओळूं रै कानां
को ‘मांय रड़कतौ म्हारै
राखौ, गावणियौ गावै
घांट्यां गैळीजै लारै'
