अेक जमानो हो,
जद लोगां नै लखावतो कै वै मिनख है
अब कीं लखावै कोनी!
अबै फुटरा कोनी लागै फुटरा,
बिडरूप झिरोखां सूं झांकण लागग्यो रूप-सरूप,
अबै तो पीड़ ई कोनी लखावै,
दोरो ई सोरो लागै
आगै लागतो, आपां जिनस कोनी हां,
कोनी हां जिनावर सींग-पूंछ वाळा,
आपां मिनख हां!
जमानो केई सबक सिखायग्यो
लुगायां नै लेवता बेचता—
अर किराया माथै उठावता लोग,
ना खुद लागै मिनख,
ना वै लुगायां लागै नारी-रतन!
गुलाम अर गरीब कमतरिया ई,
जुड़ाव सूं छिटक्योड़ा लागै जिनस जैड़ा,
अर रोजीना रो इकसार जीवण जीवता
नींद, जीमण अर भोग-भजन करता
आपां सगळा ई होयग्या हां जिनावर—
आदम जिनावर!
अबै ना आपणै कनै
हरख-पीड़ है,
ना भासा,
आपां नै लखावै ई कोनी के आपां हां!
