भरोसो भाज्यां
मिनख री जूण लाजै।
देखतां भाळतां मानखो ईंयां खुळसी
ईंयां मिनख रै हाथां मिनखपणी
कदतांईं रुळसी
कदतांईं विसवासां में विष घुळसी
बता तो सरी
आ सांच है या सपने में सपनो?
धाई घोत्यां भूखी सूथणां
अर नागी नेकरां रै हाथां
भरोसो भाटाऊं तुलसी।
काळी-पीळी कीड़्यां रा नाळ रा नाळ
उकळतै तेल में तळीजतां देख
समूची पीढ़ी री आंख्यां रा डोरा
होग्या है राता लाल।
तातै तवै पर सिकती
तीखै ताकळै पोयोड़ी
मीठै गुलगुलै सी जूण
ठौड़-ठौड़ पसर्योड़ै कीड़ी नगरै सी
पळगोडां रै पगां तळै रोजीना
किचरीजतो देख
म्हारै नूंवां रो नूंथोर
पाछी पांगरै।
