कळी फूल मै रूप बदळगी
जग री सारी बात समझगी
देखो रूत रो अेक अचंभो
दोबड़ी दरखत होगी रै
बीज मै बरकत होगी रै
आंधी सही तूफान सह्या हद
समदर उफण्या बाढ़ बाह्या नद
मझधारां सूं तीरां आई
तरणियां तरपत होगी रै
बीज मै बरकत होगी रै
कातर कातर जोड़ सींवणौ
तिणको तिणको जोड़ जीवणौ
कण कण री करणी मण बणगी
कांकरी परबत होगी रै
बीज मै बरकत होगी रै
मन मिलिया तो मनगत बदळी
राज काज री रणगत बदळी
जण जण रो बळ, बळवंत बणग्यो
नाराणी नरपत होगी रै
दोबड़ी दरखत होगी रै
