कलम सूं आडी-डोढी लीक खांचतां
भावां नैं सबद रै सांचै ढाळूं
कागद पर मांडूं अनुभूत सत नैं
नूंवै जुग रै भावबोध नैं
जणमें सो कीं नूंवो
नूंवा भाव
नूंवी भासा
आ सोचतां कै
ओ नूंवो ई
काल बणैलो सास्वत
म्हैं हांक-बांक हुयोड़ो
हेरूं-सोधूं
आपोआप नैं
सत नैं जाचतो परखतो
पण रीते हाथ!
भो-भो तांई नीं भावां री भेली
नीं सबद बेल्यां रो सांढो
म्हारै रीतेपणै अर म्हनै भाळियां
अणमणो-उदास
मुळकै है कविता
बोलै है करती मसकरी
रे बावळा!
कोरै भावां क सबदां
लारै मत भाज
विचारां रो सांढो कर देख
मांय बारै री पूरी कर फेरी
भलै ई मत ना घड़ नूंवा सबद
आंनै ई नूंवै अरथ मढ
उलांघनी पड़ै छंद री देहळी
तो उलांघ!
म्हनैं पक्कायत ई भरोसो है
घड़ लेवैला तूं
बेमाता री जात
म्हारै रूप रंग अर उणियारै नैं।
