फिरो क्यूं चितबंगा ठौड़-ठौड़
अब लो ध्यान अेकण कानी मोड़
राष्ट्रभाषा है सिर-मौड़ पण
कोन्यां मात-भासा री जोड़।
खींचा-ताणी रै इण जमानै
लागी जिण में होडा-होड
भोळा! थांनै लागै क्यूं नीं
फेरूं सूं चेतन रो कोड।
किण खूंटां सूं बंध्या थे
इतरी लांबी जिण री डोर
भूल रैया हां म्हे तो खुदनै
आपां में आ मोटी खोड़।
हिरदै रो हरियो रंग जिण में
जलमभोम री उठै हिलोर
झुर-झुर होय रही बदरंगी
मा भासा काळजियै – कोर।
भूल्या – भटक्या भळै फिरोला
जे बेगा नहीं चेतोला
कद देखांला बो दिनड़ो जद
सगळा इण सूं हेत करोला।
