बीं कनै आख्यां तो है
पण खाली देखण खातर
बीं कनै कान तो है
पण आपनै ई सुणन खातर
बीं कनै मुंडो तो है
पण खाली ताळुआं स्यूं
चिपक्योड़ो रेण खातर
बीं कनै बूकिया तो है
पण खाली आपरो ई भार ढ़ोवण खातर
बीं कनै माथो तो है
पण खाली हिलावण खातर
बीं कनै हाथ तो है
पण खाली एक दूजे रै हाथ नै
पंपोलण खातर
बीं कनै पेट तो है
मजबूरी सगळी पचावण खातर
बीं कनै डील माय लाल पाणी तो है
पण धीरै-धीरै बरफ माय बदलीजण खातर
टेक राख्यो है बो आपरे डील नै
आपरै बां पगा उपरां
जिका पग लारनै मुड़्योड़ा है
बो न आगै बधै है न लारनै जावै है
खड्यो है आपरी ही जिग्या साव थिर
कदतांई?
हूं पूछूं हूं—
कदताई खड्यो रैह्सी
ई तर्यां, ई हाल माय
म्हारै मुलक रौ आम मिनख
म्हारै प्रजातंत्र रौ आम मिनख।
