थां क्हो नै दाजी
म्हूं कांई मं पाछै छूं
रोटी पो री, गोबर कर री,
पाणत कर री
वो देखो थाको टेक्टर चला री छूं
अब बताओ कांई
घटग्यो थांकै,
पढबा जारी
अव्वल आरी
थांका भाया सूं
ज्यादा नंबर लारी
खेलबा मं भी कोई न पाछै,
आच्छ्या-आच्छ्या नै पछाड़ री छूं
चपरासी तो कांई
कलक्टर बण’र
चोखा-चोखा नै पाछै चलारी छूं,
वा देखो सीमा पै खडी होर
पहरेदारी कर री छूं
थां क्हो नै दाजी
म्हूं कांई में पाछै छूं!
मेंबर बणगी,
सरपंच बणगी,
मंत्री की कांई बात करो
प्रधानमंत्री बण’र देश
चलारी छूं
थां का छोरां नै तो
तेजाब फैंक दियो छो
फेर भी जी री छूं
फिल्मी परदा पै
आ री छूं,
थां क्हो न दाजी
कांई घटग्यो थांकै
थां नै तो फिकवा दी छी बाड़ मं
फेर भी बचगी
और मान राख्यो थांको
बहण-बेटी तो छूं ही
घर की लाडी बण’र
पोता को मूंडो म्हूं ई तो
दिखा री छूं
थां क्हो नै दाजी फेर भी
कांई घटग्यो थांको।
