म्हैं हियै उपजा नीं सक्यो
बै रूंखड़ा
जका म्हारा बडेरा रुखाळता हा।
दड़-दड़ पाणी राखता
राबां-रोटी रांधता
खेजड़ली री छांव में
अेवड़-गायां री खुरताल में
जीवन निपज सुपना बोवता हा
पण
म्हैं हियै उपजा नीं सक्यो
बै रूंखड़ा
जका म्हारा बडेरा रुखाळता हा।
भूरट, कांटी रा निदाण कर
डांडी बणावता
उण डांडियां रा
सब पदचाप पिछाणता
पण
म्हैं हियै उपजा नीं सक्यो
बै रूंखड़ा
जका म्हारा बडेरा रुखाळता हा।
