जठै हरा-भरा रूंख हा,
साक-बाड़ी सूं लैरावता खेत हा,
पाणी सूं लबालब भरयोड़ौ तळाव हौ,
रूंखां-झाड़ां सूं अट्योड़ा
जंगळ हा, मगरा हा!
पसु हा, पगसी हा!
पंछियां री भोर में किल्लोळ ही!
गोधूळी बेळा में
रंभावती गायां ही,
बाछड़ा हा, मिणियावता उन्या हा!
स्याणा-बाणा
भोळा-ढाळा लोग हा।
काम करतोड़ी
गीत गावती बहुवां ही,
हंसतोड़ी, ठिठक्यां करती बेटियां ही!
बडा-बूढां री ठिठोळ्यां ही
कठैई अलगोजा रौ राग हौ
कठैई तेरह-ताळ ही
कठैई ब्यावला रा गीत हा
सगळां में हेत हौ, प्रीत ही
आखौ गांव सरगधाम हौ, जियां
बठै देवतावां रौ वास हुवै!
जाणै किणरी निजर लागी
जाणै किणरौ लागौ साप?
बठै अबै नी देवता बसै
नीं गांव रा भोळा-ढाळा लोग।
बठै अबै
नी जंगळ है, नीं जिनावर है
नीं हरिया-भरिया खेत है, नी रूंख है
नीं गायां रंभावै, नीं उन्या मिणियावै है।
अेक कानी सूखौ तळाव है
दूजी कानी नागा भाकर है
कीं बचियोड़ा भूखा लोग है
पतौ नी औ जोग है कै संजोग है
पाणी रा रेला ज्यूं
म्हारा गांव नै सैर गिटग्यौ है!
अबै वठै चारूंमेर
धुंवौ है, परदूसण है
जंगळ री जगै औद्योगिक छेत्र है
खेतां मांय बस्ती है, मकान है
बिकाऊ प्लोट है
बणतोड़ा कारखाना है, होटलां है।
उपनगरी री आपाधापी है
चैल-पैल खासी है, पण
दुखड़ो म्हारै गांव रौ
पीड़ा म्हारा गांव री कुण नापी?
झूठा नेता, दोगला साहूकार
मक्कार अफसरिया अर ठगोरा ठेकेदारां
बडा-बडा धीजा दीना
उधारा दीना
परलोभन दीना।
जमीन खोसी, घर खोसिया।
जरा-सो मुआवजौ देय'र
गांववाळां नै अठै-बढ़ रैवास दीनौ
सैर रा केई-केई अजगर मिळ'र
म्हारा गांव नै गिटक लियौ है।
म्हैं हरेक सूं सवाल कियौ
'म्हारी भारतमाता, ग्रामवासिणी
कठै है, कठै है, कठै है?'
सगळा मून, सगळा हक्का-बक्का!
