खेलै जठी-जठी भी ओळूं छियांपताई,
रहज्या उंठी-उंठी ही मंहदी धुली-धुलाई॥
ओळूं हिया की आसज, सणगार साज गहणो,
ओळूं जनम-जनम की, भेळी करी कमाई॥
दुस्मन हियो हिंवाळो, आंसू अणीर बैरी,
कुण नैं कस्यां मनाऊं, तकदीर खुद कसाई॥
परणी उंठी गर्याळै, जद धूळ तावड़ा सूं,
भळसी बळ्यां मरी कुण, हळदी उतार लाई॥
ओळूं दब्या मनख सूं, सोगन घला’र पूछो,
कतनीक आंख लागी, कतनीक नींद आई॥
कुण का बच्यार आया, छूटी न मोह हचकी,
सूरज उग्यां पताई, संझ्या ढळ्यां सगाई॥
