बीत्यां दिनां री
डायरी रा पन्ना पलट्या
खोलतां पलटतां यादां में
ज्वारभाटौ उछळगो
जद अठै-उठै हाथ मारतां
निजर चढ्यो
तीन बटणां रो बूसटियो
भांत-भांत रै डोरां सूं
बांधूड़ा बटण
बाहां माथे मंड्योड़ी
टैम टैम री लीटियां,
पेनां रा निसांण,
ढुळियोड़ो मध,
गळपटिये सूं निकलूड़ो
धोळो बटको,
ख़ूंजें में पड़्या बोरां रा टूचकणां,
अर खेजड़ी रे सबड़ां सूं
टूटोड़ा डोरड़ा वाळो
बा तीन बटणा रो बूसटियो...
