मरूभोम रौ म्हैल
अडग ऊभौ
ताटी रै आसरै तणियोड़ौ
किड़ियौ थनै कारीगर
किताक ब़ळां रौ बळ काढनै
आक तड़ी ओढी थूं
सिणियां देवण स़ा’रौ
डकरेल डोकां
छजियौ थनै छजारै
खींपड़ चूनड़ ओढ
टूंकी धर टींकोळी
ब़ड़ियां री वेणी गूंथ
ओपियौ थूं हदभांत।
बळती लूआं रा लपरका
अर
बाळू री चिणकां रा बणणाटां सूं
ऊबरिया मिनख थारै उदर मांय
बिरखा री बूंदां अर ठारी सूं ठरतै
मानखै री जीवारी रौ आधार बण
जस रौ भागी बणियौ थूं।
आयां नै दियौ आऊकार
जीमाया थूं कर मनवार
तिरपत किया थूं कितां नै
खुद अगन झाळां झेलतौ।
थारै में इज चूल्हौ
थारै में इज घरटी
माचा अर मचली
ओढण बिछावण रा सराजांम
धिन है थारी ओजरी
किण विध आं नै पचाया?
थारै में इज जापा जीमाया जामेतण
गीगला हींडिया हेत रै हींडै
केई धीवड़ियां नै सीख दीवी सांतरी
भायां भतीजां रौ भायलौ
थूं जस पायौ अणपार
धिन है मरुभोम रा झूंपड़ा।
