हे मां!
थे कूख री पीड़ कीदी सैन
म्हां टाबर सदीव सूं मान्यो कैहणो।
बगत रै लारै
बाळपणो, भोळप सूं बीतग्यो
लारै रैयगी समै री लकीर
छोडगी आपरा हेताळू सैनांण
न्यारै-न्यारै घरां री जूण बणगी
न्यारी पिछाण।
अरे मां!
थूं होवती तो
आ नौबत नी आवती
पीड़ काळजै में ई समावती।
मां रो अरथ टाबर
जद समझ पावै।
वै खुद मां-बाप बण जावै
टाबर री जिद
कदैई हंसावै
तो कदैई घणी ई रोवावै।
मां
जद नी होवैला
म्हारो काळजो घणो-घणो रोवैला।
डुसक्यां भरतां नैं।
उणरी तस्वीर
हिम्मत रो आसरो बंधावैला।
ढुळकता आंसुवां नैं कुण रोक पावैला।
म्हनैं
कुण हिम्मत-हूंस बंधावैला।
कुण म्हनैं सावळ समझावैला।
मां रो आंचळ अखूट
टाबर हुवै
मां रै काळजै री कोर
थारै ज्यूं म्हारी ई तूट जावैला
अेक दिन सांसां री डोर
मां टाळ म्हांनै
कुण समझै?
