मन हार हियो मत हार, थारी अब पारख होसी रे।
रख आंख्यां में थोड़ो खार, थारी अब पारख होसी रे।
खातो हबोळो, सागर अडोळो, रूंख किनारा का सूख्या।
रहग्यो अेक भोळो उड़ग्यो हो टोळौ टूटी पंखीड़ै री पांख्यां।
साथीड़ां लाद्यो भार-थारी अब पारख होसी रे।
लूंवां रा लपका, आंधी रा झपका, उनाळा कितराई बीत्या।
आंसूड़ा टपका, हिवड़ै नै बरसा, छोटा थकां नै सींच्या।
बै भूल गया उपकार-थारी अब पारख होसी रे।
साथीड़ा थारा, मतलब रा प्यारा, पीग्या इमरत रा प्याला।
बिखर्या मेळा में, बिखमी बेळा में, लाया जहर रा प्याला।
ले हिवड़ा तू मनवार थारी अब पारख होसी रे।
राज गयो थारो, धर्म गयो थारो, लोग थारी लिछमी ले भाग्या।
संपत रो भारो टूट्यो है थारो, महलां में दुसमण आग्या।
बै खावै थां पर खार-थारी अब पारख होसी रे।
तन मन दियो हो, सब कुछ दियो हो, वचना सूं सैण बण्या म्हे।
रातां बै बीतगी, बातां बिसरगी, रूस्यां नै याद किया म्हे।
पण रूठ गयो करतार-थारी अब पारख होसी रे।
अै कुण है आया, जामण रा जाया, जुग-जुग रा मेळा भरै है।
अबकै जो पाया बिछुड़ मत ना जाया, विधना रा आंक भरै है।
लै सांभ थारी पतवार-थारी अब पारख होसी रे।