मून तोड़
सून सूं आवती आवाजां
आभै गूंजता नारा
सागै होवण री घोसणावां
अर नारा री आवाज सूं तेज
उण भरी हुंकार
बधग्यो आगै, घणौ आगै
पीढ्यां री पीड़
झुकाय दी कमर
उम्मीदां रो बोझौ
लड़खड़ाय दिया पगां नैं
पण सुपनां
लगोलग देवता रैया धक्को
अर वो बावळो
कटतै पाण भी लादतो रैयो
नीं करी परवा, ताजै घावां री
पण आवाजां
सून में बैवण लागी
मून धार लियो
अर नारा
कांई ठा कठै सूं आया, कठै गया
खर-खर री आवाजां होयी
घांटी न्यारी होय पड़गी नीचै
धीर आंख्यां जोयो लारै
लारै रैया फगत
सून अर मून
कुण हा वै?
किण सारू हा?
अर अबै है कठै?
